Close

Not a member yet?Register now and get started.

lock and key

Sign in to your account.

Account Login

Bahá'íar á Íslandi


Lagið tekið á bahá'í nýárshátíðinni árið 2017
Lagið tekið á bahá'í nýárshátíðinni árið 2017

 

„Þess er ekki að miklast sem elskar ættjörð sína, heldur þess sem elskar heiminn“ - Bahá'u'lláh
 

Þórhallur Bjarnason, síðar biskup, tók þannig til orða í grein sem birtist í Nýja Kirkjublaðinu, árið 1908: Kenningar hans [Baháʼuʼlláh] eru að mörgu leyti svipaðar kenningum kristindómsins eins og mannúðlegast og göfugast er með þær farið. Að því best er vitað eru þetta fyrstu ummælin um baháʼí trúna sem birtust á prenti hér á landi.

 

Fyrsti Íslendingurinn til að játa trúna

Mynd af Hólmfríði Árnadóttur

Hólmfríður Árnadóttir

Árið 1924 kom til landsins bandarísk kona, Amelia Collins að nafni. Í stuttri heimsókn sinni kynntist hún Hólmfríði Árnadóttur, sem seinna lýsti yfir trú sinni á Bahá'u'lláh, fyrst allra Íslendinga. Hún þýddi og undirbjó útgáfu fyrstu baháʼí bókarinnar á íslensku: Baháʼuʼlláh og nýi tíminn.

Þegar önnur bandarísk kona, Martha Root, kom til landsins árið 1936 í þeim tilgangi að kynna bahá'í málstaðinn var Hólmfríður hennar stoð og stytta. Þá var trúin boðuð opinberlega í fyrsta sinn hérlendis á opinberum fundum og í fjölmiðlum, bæði útvarpi og blöðum.

 

 

 Andlegt þjóðarráð baháʼía kosið í fyrsta sinn á Íslandi

Í tíu ára alþjóðlegri kennsluáætlun fékk baháʼí samfélagið í Kanada það verkefni að sjá um þróun trúarinnar á Íslandi. Árið 1958 kom fyrsti kanadíski brautryðjandinn, Margaret Allmann, til landsins og settist hér að. Fleiri fylgdu á eftir. Þetta hafði það í för með sér að hægt var að stofna andlegt svæðisráð í Reykjavík árið 1965.

 

Mynd af fyrsta Andlega þjóðarráði bahá'ía á Íslandi

Fyrsta þjóðarráðið

Árið 1971 voru stofnuð þrjú andleg ráð til viðbótar; í Kópavogi, Hafnarfirði og Keflavík. Í framhaldi af því var hægt að kjósa í fyrsta sinn til Andlegs þjóðarráðs bahá’ía á Íslandi, árið 1972. Á Íslandi eru nú fimm andleg svæðisráð starfandi: í Reykjavík, Kópavogi, Hafnarfirði, Reykjanesbæ og á Akureyri. Átrúendurnir eru alls um 350.

 

Alþjóðlegt samstarf

Árið 1973 tók Andlegt þjóðarráð baháʼía á Íslandi í fyrsta sinn þátt í kosningu til Allsherjarhúss réttvísinnar, æðstu stjórnstofnunar baháʼí heimsins. Ári síðar hófst fimm ára áætlun um útbreiðslu baháʼí trúarinnar. Í henni fékk íslenska baháʼí samfélagið meðal annars það verkefni að sjá um þróun trúarinnar í Færeyjum. Á þessum tíma fóru margir íslenskir brautryðjendur til Færeyja til að styrkja og efla baháʼí samfélagið þar. Auk þess hafa bahá'íar tekið þátt í uppbyggingu trúarinnar á Grænlandi.

 

Útgáfa

Nokkrar baháʼí bækur hafa verið þýddar á íslensku. Meðal rita Baháʼuʼlláh má nefna Kitáb-i-Íqán (Bók fullvissunnar), Hulin orð og samantektina Úrval úr ritum Baháʼuʼlláh. Einnig hefur verið gefin út bænabók, bækur um Biblíuspádóma og samantektir af ýmsu tagi, auk efnis fyrir börn. Fyrsta bókin, sem íslenskur höfundur hefur ritað um baháʼí trúna er Baháʼuʼlláh - líf Hans og opinberun eftir Eðvarð T. Jónsson. Bókin kom út árið 1982.

 

Eignir

Baháʼí þjóðarmiðstöð er staðsett að Kletthálsi 1 í Reykjavík. Auk þess á samfélagið land undir baháʼí tilbeiðsluhús að Kistufelli í Kollafirði og jörðina Skóga í Þorskafirði, sem það erfði eftir Jochum Eggertsson skáld og rithöfund. Þar er unnið að skógrækt í samstarfi við Skjólskóga á Vestfjörðum.