1 2

Frá örófi alda hafa samfélög manna verið reist á trúarbrögðum. Samfélög bahá'ía einkennast af sérstökum lífsháttum.

Kimiko Schwerin á heima í útborg Tokyo, gift Bandaríkjamanninum John, en þar reka þau tungumálaskóla sem nýtur mikillar velgengni. Kimiko, sem fæddist í Nagasaki, hefur á margan hátt rutt veginn fyrir japanskar konur sinnar kynslóðar. Ekki aðeins að hún giftist útlendingi - en fyrir það var hún eitt sinn löðrunguð af reiðum ókunnum manni sem mislíkaði slíkt - heldur er hún líka athafnasöm í hvers kyns starfi að jafnréttismálum.

Stanlake Kukama, sem var á unga aldri héraðsforingi í Afríska þjóðarráðinu í Suður-Afríku, hætti að skipta sér af stjórnmálum á sjötta áratugnum og fór aðra leið að því marki að afnema kynþáttamisrétti í landi sínu. Þótt hann sé kominn á eftirlaun vinnur hann enn að sama markmiði og fyrir 30 árum, að leggja grunn að samfélagi sem geti verið fyrirmynd að góðum samskiptum hvítra og svartra.

Primo Pacsi á heima í Andesfjöllum Bólivíu og ræktar þar kartöflur í bröttum hlíðum að hætti forfeðra sinna sem þar hafa búið kynslóð eftir kynslóð. Pacsi naut lítillar skólagöngu. Eigi að síður hefur hann aðstoðað við að koma á forskóla fyrir þorpsbörnin. Skólinn er mikilvæg lyftistöng menntunar barnanna á tímabili sem skiptir sköpum fyrir þroska þeirra. Hann hefur einnig verið í fararbroddi í notkun ódýrra sólhitaðra gróðurhúsa og þess vegna getur hann ásamt grönnum sínum ræktað margskonar ávexti og grænmeti sem ella myndu ekki þroskast svo hátt til fjalla.

Þau þrjú, sem hér hafa verið nefnd, Schwerin, Kukama og Pacsi, eru af ólíku þjóðerni, með ólíka menntun og frá ólíkum menningarsvæðum, en þau eru sameinuð í trú sinni, þau eru bahá'íar í anda og athöfn.

Heimssamfélag bahá'ía er líklega það samfélag manna á jörðunni sem er fjölbreytilegast og útbreiddast, en samtímis er að finna innan þess einingu sem ekki á sinn líka. Bahá'íar um víða veröld eiga rætur í öllum fyrri trúarbrögðum; búddisma, kristni, hindúisma, gyðingdómi, islam, sikhatrú, zaraþústratrú og jafnvel úr hópi „andatrúarmanna“ og trúleysingja. Samt styðjast þeir nú við sömu trúarritin, fylgja sömu lögum um trúarlega siðfræði og styðjast við eitt alþjóðlegt stjórnkerfi til stöðugrar leiðsagnar.

Tilfinning þeirra fyrir einingu nær út fyrir öll þekkt trúarbrögð. Hún er látin í ljósi í skilyrðslausri hollustu við heimsáætlun um siðrænar, andlegar og félagslegar framfarir sem fela í sér margar fegurstu hugsjónir um siðmenningu.

Að koma á jafnrétti kvenna og karla er forgangsmarkmið, svo og að binda endi á kynþátta- og þjóðflokkafjandskap. Annað meiriháttar markmið þeirra er að koma á efnahagslegu réttlæti, sömuleiðis tryggja öllum skilyrði til góðrar menntunar. Samfélagið hafnar hvers kyns hjátrú og setur fylgjendum sínum það mark að ná hæsta stigi siðgæðis. Heimsfriður og stofnun heimsspannandi sambandsríkis hefur verið og heldur áfram að vera eitt verðugasta verkefnið.

Engin önnur svo fjölbreytileg heimssamtök, hvort heldur um trúmál, stjórnmál eða þjóðfélagsmál, geta státað af félögum sem eru eins hollir hugsjón sem í senn er svo einföld, samfelld og algild. Uppspretta þessarar hugsjónar er hjá Bahá'u'lláh (1817-1892), stofnanda bahá'í trúar. Hann var persneskur aðalsmaður sem lifði síðustu 40 ár ævinnar sem fangi og útlagi. Hann skrifaði jafngildi meira en 100 bóka, en þau rit leggja þann grunn sem heimssamfélag bahá'ía stendur á.