Í gegn um aldirnar hafa flest heimstrúarbrögð klofnað í marga sértrúarflokka í kjölfar deilna um ýmis túlkunar- og stjórnunaratriði. Bahá’í trúin, ein heimstrúarbragðanna, hefur ekki klofnað. Ástæðu þessa er að finna í því sem bahá’íar kalla „sáttmálann“, skýrri guðlegri ráðstöfun um það hver beri að stjórna bahá’í samfélaginu hverju sinni.

‘Abdu’l-Bahá, miðja sáttmálans

Kitáb-i-Ahd eða bók sáttmálans skrifaði Bahá’u’lláh í þessu tilgangi. Í henni kvað Bahá’u’lláh skýrt á um að elsti sonur sinn, ‘Abdu’l-Bahá (1844-1921), skyldi taka við af sér eftir sinn dag. ‘Abdu’l-Bahá tók frá barnæsku þátt í þjáningum föður síns og útlegð. Bahá’u’lláh útnefndi hann löggiltan túlkanda bahá’í kenninganna og höfuð trúarinnar eftir sinn dag. Hann er talinn fullkomið fordæmi bahá’í lífernis.

Framlag ‘Abdu’l-Bahá til framgangs bahá’í trúarinnar verður seint ofmetið. Þegar ‘Abdu’l-Bahá var enn fangi Ottómana komu fyrstu bahá’í pílagrímarnir úr Vesturheimi til ‘Akká, árið 1898. Eftir að hann var leystur úr haldi, árið 1908, lagði ‘Abdu’l-Bahá af stað í löng ferðalög. Hann ferðaðist um Evrópu og Ameríku á árunum 1911-1913. Þar kynnti hann boðskap Bahá’u’lláh um einingu og félagslegt réttlæti fyrir kirkjusöfnuðum, friðarsamtökum, félagsmönnum í verkalýðsfélögum, háskóladeildum, blaðamönnum og embættismönnum ríkisstjórna og ræddi oft við almenning um þessi mál.

‘Abdu’l-Bahá andaðist árið 1921, en þá hafði hann treyst undirstöður bahá’í trúarinnar og breitt hana út til mun fleiri manna. Herbergi norðan til í helgidómi Bábsins, þar sem hann er jarðsettur, er einn þeirra staða sem pílagrímar fara til þegar þeir heimsækja heimsmiðstöð trúar sinnar.

Guðleg leiðsögn til framtíðar

Í erfðaskrá sinni útnefndi ‘Abdu’l-Bahá dóttur son sinn, Shoghi Effendi Rabbani vörð bahá’í trúarinnar og túlkanda kenninga hennar. Shoghi Effendi leysti þetta starf af hendi til dauðadags árið 1957. Á þessum þrjátíu og sex árum þýddi vörðurinn mörg rit Bahá’u’lláh og ‘Abdu’l-Bahá á ensku, útskýrði merkingu þeirra, hvatti til mynar bahá’í stofnana á svæðisbundnum og þjóðlegum vettvangi og veitti leiðsögn sína varðandi áætlanir sem miðuðu að því að útbreiða bahá’í hugsjónir um víða veröld. Í Landinu helga verður hans ávallt minnst fyrir þá glæsilegu umgjörð sem hann skapaði um Heimsmiðstöð bahá’í trúarinnar. Hann lét fullgera helgidóm Bábsins og reisas Alþjóðlega bahá’í minjasafnið. Shoghi Effendi teiknaði einnig og hannaði fallegu garðana í Bahjí og í hlíðum Karmelfjalls.

Eitt af markmiðunum með stofnun bahá’í svæðis- og þjóðarstofnana var að tryggja undirstöðurnar fyrir stofnun æðstu stofnunar bahá’í trúarinnar sem kveðið er á um í ritum Bahá’u’lláh, Allsherjarhúss réttvísinnar. Það var ekki fyrr en eftir andlát Shoghi Effendi að það varð mögulegt en þá komu meðlimir allra þjóðarstofnana bahá’í samfélagsins saman í Landinu helga til að kjósa meðlimi Allsherjarhússins.

Hús réttvísinnar stjórnar andlegum og stjórnfarslegum málefnum Alþjóðlega bahá’í samfélagsins. Það ber einnig ábyrgð á Bahá’í helgistöðunum og öðrum eignum í Landinu helga. Það eð Bahá’u’lláh veittti því rétt til að setja lög um öll málefni sem ekki er sérstaklega kveðið á um í bahá’í ritningunum, er hús réttvísinnar sú stofnun sem gerir bahá’í samfélaginu kleift að fylgjast með tímanum í síbreytilegum heimi.

Næsta síða