Bahá'í trúin hefur þegar fest rætur hér á Íslandi. Andlegt þjóðarráð bahá’ía á Íslandi, æðsta stjórnstofnun trúarinnar hér á landi, nýtur fullrar viðurkenningar sem trúfélag utan Þjóðkirkjunnar. Bahá’íar voru 230 talsins í desember 1981. Í apríl 1997 voru þeir 420. Bahá'u'lláh var, að því best er vitað, fyrst getið á prenti hér á landi árið 1908, er Þórhallur Bjarnason, síðar biskup, fór um hann svofelldum orðum:

Fyrir fjörutíu árum reis upp dýrlegur kennimaður og guðsvottur í Persalandi, og hét hann Baha Ullah. Eins og við mátti búast, dó hann píslarvættisdauða - andaðist í tyrkneskri prísund 1892. Margir fylgjendur hans hafa látið lífið fyrir trúarskoðanir sínar, en þær breiðast því betur út. Kenningar hans eru að mörgu leyti svipaðar kenningum kristindómsins eins og mannúðlegast og göfugast er með þær farið.
(‘Persneskur Messías’, Nýja Kirkjublaðið, 3. tbl., 3. árg.)

Fyrsti bahá'ínn
Árið 1924 kom til landsins bandarísk kona, Amelia Collins að nafni. Í stuttri heimsókn sinni kynntist hún Hómfríði Árnadóttur, sem þýddi og undirbjó útgáfu fyrstu bahá’í bókarinnar á íslensku: ‘Bahá'u'lláh og nýi tíminn’. Hólmfríður var um langt skeið safnvörður í Listasafni Einars Jónssonar. Hún var síðar fyrsti bahá’íinn á Íslandi. Ellefu árum síðar, eða 1935, kom þekktur bahá'í ferðakennari til landsins, Martha Root að nafni. Hófust þá fystu opinberu kynningar á bahá'í trúnni hérlendis með fyrirlestri í Háskólanum, viðtali í útvarpi og greinum í blöðum.

Áætlanir
Í tíu ára alþjóðlegri kennsluáætlun, sem Vörður bahá'í trúarinnar, Shoghi Effendi, hleypti af stokkunum, fékk bahá'í samfélagið í Kanada það verkefni að sjá um þróun bahá'í trúarinnar á Íslandi. Árið 1958 kom fyrsti kanadíski brautryðjandinn til landsins og settist hér að. Fleiri fylgdu á eftir. Þetta hafði það í för með sér að unnt var að stofna fyrsta andlega ráðið hér á landi með aðsetri í Reykjavík 1965. Upp úr því varð þróunin örari. Bahá'í hjónavígslur fengu löggildingu og fyrstu bahá'íarnir giftu sig hérlendis 1967. Eins og fyrr segir fékk Bahá'í trúin formlega viðurkenningu stjórnvalda 1975. Síðar fékkst viðurkenning Menntamálaráðuneytisins á bahá'í helgidögum fyrir skólanema. Árið 1971 var ráðist í að kaupa musterisland í Kópavogi og sama ár voru stofnuð þrjú andleg ráð til viðbótar: í Kópavogi, Hafnarfirði og Keflavík. Þetta gerði það mögulegt að kjósa í fyrsta sinn til Andlegs þjóðarráðs bahá’ía á Íslandi árið 1972. Árið 2001 var musterislandið í Kópavogi selt og nýtt land keypt á Kjalarnesi sem hlaut nafnið Kistufell.

Útbreiðsla
Í september 1971 var haldin alþjóðleg bahá'í ráðstefna í Reykjavík, sem sótt var af rúmlega 800 manns frá 36 þjóðlöndum. Andlegt þjóðarráð bahá’ía á Íslandi tók í fyrsta sinn þátt í kosningu til Allsherjarhúss réttvísinnar, æðstu stjórnarstofnunar Bahá'í heimsins, sem kosið er til með fimm ára millibili af öllum þjóðarráðum, árið 1973. Ári síðar hófst Fimm ára áætlun um útbreiðslu bahá'í trúarinnar sem Allsherjarhús réttvísinnar hleypti af stokkunum. Í henni fékk íslenska bahá'í samfélagið m.a. það verkefni og markmið að sjá um þróun trúarinnar í Færeyjum. Nú eru sex andleg svæðisráð starfandi á Íslandi og eitt í Færeyjum og bahá'íar eru búsettir um allt land. Bahá'í lesefni hefur verið þýtt ásamt ýmsum kynningarritum. Fyrsta bókin, sem íslensku höfundur hefur ritað um bahá'í trúna er Bahá'u'lláh - líf Hans og opinberun eftir Eðvarð T. Jónsson og kom hún út árið 1982.

Eignir
Eignir íslenska bahá'í samfélagsins eru, auk musterislandsins á Kistufelli, húseign að Öldugötu 2, Reykjavík sem keypt var árið 2001 og jörðin Skógar í Þorskafirði, sem Jochum Eggertsson arfleiddi íslenska samfélagið að. Andlegt þjóðarráð bahá'í á Íslandi hefur nú aðsetur að Öldugötu 2, Reykjavík. Þar eru m.a. skrifstofa þjóðarráðsins, bóksala og aðsetur Andlegs ráðs bahá’ía í Reykjavík.

Næsta síða