Hafin eru réttarhöld við byltingardómstól í Teheran yfir sjö leiðtogum bahá’í samfélagsins í Íran sem setið hafa í fangelsi hátt á annað ár og eiga yfir höfði sér líflátsdóm fyrir „trúarspjöll“ og „að útbreiða spillingu á jörðinni“.

Síðustu dagana hafa auk þess á annan tug bahá’ía verið handteknir, sakaðir um að hafa skipulagt fjöldamótmælin í Teheran 27. desember síðastliðinn þegar öryggissveitir skutu nokkra mótmælendur til bana, þar á meðal bróðurson Husseins Mousavis, leiðtoga stjórnarandstöðunnar. Meðal hinna handteknu er fyrrverandi ritari Shirin Ebadi, friðarverðlaunahafa Nóbels, en hún er nú er í útlegð á Spáni. Ebadi var lögfræðilegur ráðgjafi bahá’íanna sjö sem setið hafa í Evin fangelsinu í Teheran í tæp tvö ár án þess að þeim hafi formlega verið kynntar ákærur. Fars fréttastofan íranska og málgögn stjórnarinnar halda því fram að hinir handteknu séu stuðningsmenn Mousavis og að vopn og skotfæri hafi fundist á heimilum þeirra.

Talsmenn alþjóðlega bahá’í samfélagsins hjá Sameinuðu þjóðunum í Genf segja þessar ásakanir tilhæfulausar og lýsa yfir sérstökum áhyggjum af því að írönsk yfirvöld vilji með þessu gera bahá’í samfélagið að blóraböggli í inanlandsátökum og réttlæta þyngstu refsingu sem írönsk lög kveða á um yfir sjömenningunum. Meðal þeirra eru læknar, kennarar og félagsráðgjafar sem unnu við að aðstoða fjölskyldur sem misst höfðu atvinnu og lifsviðurværi vegna trúarskoðana.

Frá því klerkstjórnin tók völd í Íran hafa rúmlega 200 bahá’íar verið líflátnir, þar af 17 forystumenn samfélagsins. Um 50 bahá’íar bíða nú dóms í írönskum fangelsum.

Félags- og mannréttindanefnd Sameinuðu þjóðanna samþykkti fyrir skömmu með yfirgnæfandi meirihluta atkvæða harðorðustu yfirlýsingu gegn mannréttindabrotum í Íran sem Sameinuðu þjóðirnar hafa látið frá sér fara síðan byltingin var gerð í Íran 1979. Kanada lagði fram ályktunina ásamt 42 öðrum löndum, þar á meðal Íslandi. Þar er sérstaklega fjallað um árásir á bahá’ía í ríkisfjölmiðlum og stóraukið eftirlit lögreglu og leyniþjónustu sem felur m.a. í sér heimildir til að handtaka bahá’ía hvenær sem er og meina þeim um skólavist og atvinnu.

Bani Dugal, aðalfulltrúi alþjóðlega bahá’í samfélagsins hjá Sameinuðu þjóðunum, segir að ályktunin hafi sent ákveðin skilaboð um að alþjóðasamfélagið muni ekki standa hjá og horfa þegjandi á írönsk stjórnvöld fremja brot af þessu tagi. Dugal segir að Allsherjarþingið hefur bent á fjölmörg brot gegn óbreyttum írönskum þegnum, þar á meðal pyndingar, misbeitingu valds, undirokun kvenna og stöðuga mismunun gegn minnihlutahópum, ekki síst bahá’íum sem eru stærsti trúarlegi minnihlutahópur landsins.

Frá því íslamska lýðveldið Íran var stofnað hafa um tvö hundruð bahá'íar verið líflátnir en tugir þúsunda hafa misst atvinnu eða neyðst til að flýja heimalandið. Ungum bahá'íum hefur verið neitað um inngöngu í háskóla og framhaldsskóla og fólk sem komið var á eftirlaunaaldur hefur verið svift eftirlaunum og ellilífeyri. Í leyniskjölum írönsku stjórnarinnar sem Mannréttindanefnd SÞ fékk í hendur og lét birta árið 2006 er að finna áætlun um upprætingu bahá'í samfélagsins í Íran með langtímaaðgerðum sem meðal annars miða að því að fá þá til að ganga af trúnni og játast íslam.

Hægt er að fylgjast með nýjustu fréttum af gangi mála á alþjóðlegum fréttavef bahá‘ía á slóðinni http://news.bahai.org/